Gaur egun badakigu bizitzan arrakasta izateko ez dela nahikoa arlo akademikoan oso ona izatea, arlo emozionalak ere badu sekulako garrantzia hori lortzeko. Horregatik, Haur Hezkuntzan orain dela urte batzuk ahalmen hau lantzen hasi ginen. Noizean behin ariketa eta ipuin desberdinak egiten baditugu ere, egunero lantzen dugu nola sentitzen garen, eta egunean zehar suertatzen diren egoera desberdinak aprobetxatzen ditugu emozioak lantzeko.

Baina hau geletara eraman ahal izateko, ezinbestekoa zen irakasleriak formazioa jasotzea, gu baikara ikasleen eredua. Eta horretan ibili gara urteetan: geure burua ezagutzen, nor garen, zergatik garen garen modukoak, nork eta zer egoerek egin gaituzten horrelakoak, emozioak nola kudeatu…

Lehen Hezkuntzan aldiz, irakasleriarekin iaz hasi ginen kontzientziazio saioekin; irakaslearen profilak nolakoa izan behar duen eztabaidatzen, bakoitzaren pentsamenduek zelan mugatzen gaituen, automotibazioa, gelditzen jakitea eta abar. Ikasturte honetan emozio desberdinetaz arituko gara eta apurka-apurka proiektuan murgiltzen joango gara.